Qurilayotgan uydan kvartira olish: nimalarga e'tibor berish kerak

Qurilish bosqichida kvartira topshirilgan uydagidan sezilarli arzon — lekin bu chegirma o'z-o'zidan emas: siz quruvchiga ishonch bildirasiz. Ishonchni esa tekshirish mumkin va kerak. Quyida — ko'p yillik tajribamizdan kelib chiqqan amaliy tavsiyalar.

Quruvchining tarixini o'rganing

Eng ishonchli ko'rsatkich — topshirilgan loyihalar. Kompaniya nechta uy qurgan, o'z vaqtida topshirganmi, avvalgi xaridorlar nima deydi? Masalan, Elite Building 2015-yildan beri faoliyat yuritadi, 2 500 dan ortiq xonadon topshirgan; Qorasuv Premium loyihamiz to'liq sotilib, egalariga topshirilgan. Yangi kompaniyalarda esa bunday tarix bo'lmaydi — bu avtomatik «yo'q» degani emas, lekin qo'shimcha ehtiyotkorlik talab qiladi.

Hujjatlar va shartnoma

Shartnomani imzolashdan oldin diqqat bilan o'qing: unda kvartiraning aniq manzili (blok, qavat, xonadon raqami), maydoni, narxi, to'lov jadvali va topshirish muddati yozilgan bo'lishi shart. Quruvchidan yer uchastkasi hujjatlari va qurilish ruxsatnomasini so'rashdan uyalmang — jiddiy kompaniya ularni bemalol ko'rsatadi.

Qurilish jarayonini kuzating

Yaxshi belgi — obyektda doimiy faollik: texnika ishlayapti, qavatlar ko'tarilyapti. Obyektga borib ko'ring (biz mijozlarni qurilish maydonchasiga olib borishdan mamnunmiz), quruvchining ijtimoiy tarmoqlaridagi jarayon hisobotlarini kuzating. O'z brigadalariga ega kompaniyalar (bizdagidek) pudratchilarga bog'liq kompaniyalardan barqarorroq quradi.

Xarid oldidan 7 savol

Ofisga borganingizda menejerdan so'rang:

• Kompaniya nechta loyihani topshirgan va qayerda?
• Bino qachon topshiriladi va bu shartnomada yozilganmi?
• Narxga nimalar kiradi (ta'mir holati, parkovka, kommunikatsiyalar)?
• To'lovlarni kim nazorat qiladi va kvitansiya beriladimi?
• Qurilish qanday materiallardan olib borilyapti?
• Rassrochkani muddatidan oldin yopish mumkinmi?
• Obyektga borib ko'rish mumkinmi?